Sheekada Dameerkii Juxa

Maalin ayaa Juxa dameerkiisii suuqa keenay si uu u iibiyo. Intuu dameerkii hogaaminayay ayuu wiilkiisii yaraana raacay. Juxa ayaa dameerkii fuulay, wiilkiisuna wuu lugeeyay. Dadkii suuqa joogay ayaa ku yidhi:
“Eeboow, bal eeg! Ninkaan waa nin xun, isaga ayaa fuushan dameerka, ilmahiisana waa daalinayaa.”

Markaas Juxa wuu ka degay, wiilkiisii buu dameerkii saaray. Markay sii socdaan dad kale ayaa ku yidhi:
“Waa maxay nacasnimadani? Wiil yar baa fuushan, ninka weynna waa lugaynayaa!”

Juxa iyo wiilkiisii waxay go’aansadeen inay wada fuulaan dameerkii. Dadkii kale ayaa arkay waxayna yiraahdeen:
“Dameerkii waa la dilayaa! Labadooduba way fuuleen, sidee ayuu u qaadi karaa?”

Markaas ayay hoos u deggeen labadooduba, dameerkii bay wada hogaamiyeen iyagoo lugaynaya. Markay suuqa soo galeen, dadkii way qosleen oo waxay yiraahdeen:
“Bal eeg labada nacas! Dameer bay haystaan, haddana way socdaan.”

Juxa markaas ayuu qoslay, wuxuuna wiilkiisii ku yiri:
“Wiilkaygiiyow, ogow, dadka mar walba wax bay odhan doonaan. Haddaba ku samee waxa qalbigaaga kugu fiican.”